土耳其憤怒中年

話說我有間常去的中東菜館（旺角Our Restaurant），食物一般般，但在旺角女人街，就腳之餘又幾好坐，總之諗唔到食乜就走過去劣食。雖然如此，老闆總是忙着送餐，坐得夜也未必有機會吹水。

終於！今次談起土耳其總理埃爾多安（Recep Tayyip Erdoğan，經老闆指正其實譯音一如其他國際人物，是錯的），引到了老闆一肚火起，激起他的愛國情緒，講到土耳其入歐、與美帝關係、以色列，簡單講就是「西方國家亡我之心不死」，憤青上身地分析外國想怎樣瓜分土耳其！


他講了半個鐘有多，幾乎都是他自己在講，雖然我跟朋友Alan清楚明白土耳其局勢，但他活像教小學生一樣由600多年前講起，又寫重點又畫圖，試圖解釋為甚麼西方國家要消滅土耳其...

內容太多，僅將其金句摘錄如下，各位自行判斷呢位反美、憎以、疑歐的老闆，似唔似一名大陸憤青...

（老闆操流利英語，譯為廣東話僅為傳神）

• 「係德國人請我地土耳其人去娶德國女人，解決人口問題！要搵工人可以搵女人，點解係都要搵男人？」

• 「你睇下德甲宜家有幾多土耳其球員！（皇馬？）我梗係識啦！」

• 「奧圖曼帝國650年黎無嘗試侵略同改變任何國家！我地和平相處架，你睇下宜家我地比人害到剩返幾少地方？」

• 「點解我地要講希臘？希臘算罷啦！」

• 「歐洲唔想我地入去係因為我地人口多，隨時霸左佢地既控制權！」

• 「911係美國自編自導自演，目的係搞亂阿富汗搞走唔聽話既塔利班！搞完伊拉克，將一個國家打散哂做唔同種族，下個就到我地！因為美國以色列同歐洲都唔想見到我地咁優秀，可以三教和平相處！」

• 「我同人講梗野，你地去做野！」（同下屬講，好緊張咁要繼續向我地訓話）

• 「你唔知我地其實祖宗一樣？（下？）嗱中國呢忽就叫東突厥斯坦，佢地就慢慢向西移，（我知六個突厥國家嘛），去到土耳其已經係我地建立既第十六個國家...」

• 「美國佬？我係美國做過五年野，我夠膽話我同佢地咁高咁大，仲勁過佢地！佢地越南又輸，阿富汗又輸，（泡菜？）泡菜都係，伊拉克都無贏過！」

• 「我以前係土耳其東南邊大，係就係幾好，不過西邊好d，因為唔落雪。」

• 「伊斯蘭教好和平，唔搞人地，we know peace！我地唔洗其他人（指美國以色列）教我地咩叫和平。我由細到大身邊都有基督徒猶太教徒，一齊返學。只係人地打我，我就會反擊！」  

• 「你知我地土耳其人生得多，我都有八個兄弟姊妹…我有個朋友三四個老婆，生左廿幾件，連仔女叫乜都唔多記得。」

• 「我地土耳其人同其他地方文化唔同架，同阿拉伯世界唔同，同歐洲都唔同。我地係歐洲中東中亞橋樑來架，所以我地幾唔鐘意美俄都好，都一定要有計傾。」

• 「你知唔知俄羅斯人日日係加盟共和國度殺幾百人，尤其係阿富汗邊境？新聞唔報之嘛！」

• 「我係美國嘅時候見過個揸F16戰機嘅美軍機師。我問佢你有冇開過航展表演？我地土耳其飛F16表情公認最靚，而家重八架一齊飛添。」

仲有佢唔識讀Palestine，會讀成Filistine。佢都幾靚佬架。